Үйл ажиллагаа хариуцсан захирал

Сургалтын менежер

Сайн байцгаана уу? Смарт сургуулийн сургалтын менежер Б.Пүрэвсүрэн байна. Та бүхэн минь сайхан наадаж байна уу? МУИС-Байгалийн ухааны тэнхим-Химийн багш мэргэжлээр төгссөн.
Миний бие боловсролын салбарт 8 дахь жилдээ ажиллаж байгаа бөгөөд ажиллаж буй хугацаандаа:
-Багш
-Сургалтын менежерээр тус тус ажиллаж байна. Ажиллах хугацаандаа гаргасан амжилт:
-Дүүргийн менежерүүдийн спортын наадамд ганцаарчилсан төрөлд “ Шатар”-аар 3-р байр
-Шилдэг залуу багш
-Шилдэг хөтөлбөр боловсруулагч багш
-Заах арга зүйч
-Тэргүүний залуу багш алтан медаль
-Бэлтгэсэн шавь улсын Химийн олимпиадад тусгай байр
зэрэг амжилтуудыг гаргасан.

Ямарч ажлыг чин сэтгэлээсээ өөриймсөг, чанартай хийж байж өөртөө аз жаргалыг мэдэрдэг. Даруухан бөгөөд үнэн оршихыг хүсдэг минь амьдралын гол зарчим.

Би хүүхдүүдэд зөвхөн химийн шинжлэх ухааны онол заахаасаа гадна амьдралд хэрхэн хэрэглэгддэг, хаана ашигладаг тухай практик дээр илүү зааж сургахыг хүсдэг учраас химийн багш мэргэжлийг сонгосон.

Ихэнх хүмүүс энэ хичээлийг химийн урвал бичдэг, үелэх системий хэдэн элемент цээжлэх ёстой амьдралд хэрэггүй гэсэн ойлголттой байдаг гэтэл бидний бүх идэж, хэрэглэж байгаа зүйлс химийн урвалд орохгүйгээр бүтээгдэхүүн болохгүй . Тиймээс би хүүхдүүдэд зөвхөн химийн шинжлэх ухааны онол заахаасаа гадна амьдралд хэрхэн хэрэглэгддэг, хаана ашигладаг тухай практик дээр илүү зааж сургахыг хүсдэг.

Бага ангийн сургалтын менежер

Бага ангийн багш

Амжилт хүсье бяцхан шавь нартаа

Хятад хэлний багш

Сайн байцгаана уу? Смарт сургуулийн хятад хэлний багш Д.Сампилноров байна. Хүүхдүүд минь эрүүл саруул байж, түүний ирээдүй гэгээлэг байгаасай гэж хүсдэг. Гэхдээ хүсэх хангалтгүй, тэднийхээ төлөө үйлдэл заавал хийх ёстой. Миний хүүхдүүд сайн сургуульд сурч, сайн боловсрол эзэмшиж болох ч түүнийг хүрээлэн буй нийгэм, түүний үе тэнгийнхний хандлага, төлөвшилт, боловсрол, зан төлөв ч түүнд минь нөлөөлөх нь ойлгомжтой. Тиймээс би багш мэргэжлээрээ ажиллаж хүүгийн минь үе тэнгийн олон олон хүүхдүүдийг ирээдүйд өөртөө болон эх орондоо үнэ цэнтэй иргэн болоход хувь нэмрээ оруулж яваа.

Хүүхэд заавал шилдэг, төгс нэгэн болох албагүй. Математиктаа байнга онц авах ч хэрэггүй. Гагцхүү хүнийг хайрлах сэтгэлтэй, эрүүл харилцаатай, амьдралын зөв хэвшилтэй эзэмшсэн мэргэжилдээ эзэн болох л чухал. Боловсрол үнэ цэнтэй.

Биднийг бага байхад эрэгтэй хүүхэд яахав дээ, барилга дээр ч болов ажиллаад амьдралаа аваад явна гэх яриаг олон сонссон. Гэхдээ нийгэм өөрчлөгдөж байна. Тав эсвэл тавин жилийн дараа яг ямар ирээдүй хүлээж буйг төсөөлөхөд ч хол санагдаж байна. Эд хөрөнгө хуучирч эрдэм мэдлэг л үнэ цэнтэй байгаасай. Тийм болохоор эрэгтэй байна уу? эмэгтэй байна уу? үл хамааран боловсролыг тэгш бөгөөд хүртээмжтэй чанартай байгаасай гэж багш ээжийн хувьд хүсдэг дээ…

Яг энэ хүсэл, ажил, ээж байх бүхэн минь нэг цэгт огтлолцож би Смарт олон улсын сургуулиар овоглосон багш ээж болсон юм. Хүүгийн минь үеийн олон олон хүүхдэд математик гэх аугаа шинжлэх ухааныг заан сургаж, ирээдүйд энэ сургуулиас төрөн гарах олон олон мэргэжилтэнг бид хамтдаа бэлтгэж, дэлхийд цахиур хагалах дараагийн шинэ эриний суурийг тавих эхлэлд гар бие, сэтгэл зүрхээ зориулан суугаадаа маш их баяртай байна.

Шилдэг хөтөлбөр, боловсон хүчин, чанартай сургалтын систем, цахим платформ, эрүүл аюулгүй орчин нөхцөл бүрийг ээж хүний нүдээр харахад бахдалтай сайхан байна, багш хүний нүдээр харахад зааж сургах оргилсон их хүсэл, хийж бүтээх хүсэл эрмэлзэл улам нэмэгдэж, чанартай боловсролыг түүчээлэхэд бид бэлэн байна.

Хүүгээ хайрлах ээжийн хайраар сурагчдаа хайрлаж, сургаж хүмүүжүүлэх болноо.
Бяцхан үрсийнхээ гэрэлт ирээдүйн төлөө хамтдаа хичээцгээе.
Багш ээжээс нь.

Сургалтын менежер

Б.Бадмаажин -дунд ангийн сургалтын менежер
1. Төгссөн сургууль:
МУБИС Нийгэм Хүмүүнлэгийн Ухааны Сургууль-Монгол хэл, уран зохиолын багш
2. Боловсролын байгууллагат ажиллаж буй ажил:
Сургалтын менежер, мхуз-ын багш
3. Гаргасан амжилт:
-Завхан аймгийн хэмжээнд морин хуурын сургагч багшаар ажиллаж байсан бөгөөд “Эрдмийн өргөө”, “Оюуны ирээдүй” зэрэг сургуулиудад сургагч багшаар ажиллаж байсан.
– Улсын хэмжээнд 3000 морин хуурч бэлтгэх, тоглолт зохион байгуулах үйл ажиллагаанд зохион байгуулагчаар ажиллаж байв.
– Завхан аймгийн Тосонцэнгэл сумын Оюутан Залуучуудын холбоонд нарийн бичгийн даргаар ажиллаж байсан. Ажиллаж байх хугацаандаа нийгмийн сайн дурын олон үйл ажиллагааг удирдан зохион байгуулж байсан.

Шагнал урамшуулал:
– Монголын Залуучуудын холбооны “Алма-матер” ёслол Бүтээлч оюутан шагнал
– 2021-2022 оны байгууллагын шилдэг ажилтан
– 2022-2023 онд Хан-уул дүүргийн “Манлайлагч Залуу”
4. Баримталдаг зарчим:
Аливаа ажилд эмх цэгцтэй, бүтээлчээр ажиллахыг илүүд үздэг. Хариуцлагатай, төлөвлөгөөтэй ажиллахыг гол зарчмаа болгодог.
5. Багш болсон шалтгаан: Хүүхэд байхаасаа бусдад хичээл заах, морин хуур заах сонирхолтой байсан. Мөн ЭЕШ-аар өндөр оноотой байсан тул МУБИС-д 4 жил тэтгэлэгтэй суралцах боломжтой болсон нь нөлөөлсөн.

Математикийн багш

Сайн байцгаана уу? Смарт сургуулийн математикийн багш Б.Буянхишиг байна.

Улсын хэмжээнд 32085 үндсэн багш байгаагийн жирийн нэг багш мэргэжилтэй би бээр математикийн талаар үзэл бодлоо товч сийрүүлээхээс гадна яагаад математикийн хичээл чухал талаар бичье ээ.

Зарим хүмүүст огт чухал биш, ойлгоход төвөгтэй, өдөр тутмын амьдралд ус агаар мэт хэрэгтэй зүйл огт биш гэж боддог. Мэдээж талх авахдаа тригонометрийн үндсэн адилтгал, алгебрын долоон томьёо, Пифагорын теоремыг өдөр бүр хэрэглэнэ гэж үгүй. Эдгээр томьёо бодлого бол нүдэнд харагдах төдий зүйл юм. Энгийнээр хэлэхэд математик бол эмх цэгц ба асуудал шийдвэрлэх гарц гаргалгаа болж оршсоор ирсэн, оршсоор ч байна. Далдаас маш хүчтэй удирдана.

Магадгүй та мэргэжлээ сонгох гэж байгаа, аль эсвэл сонгочихсон байж мэднэ. Математикаас тэс хөндлөн мэргэжил эзэмшсэн, эзэмших гэж байгаа ч байж мэднэ. Тэр бүгдэд ч математик хэрэгтэй гэвэл та гайхах байхдаа.
Хэрэвзээ математик байгаагүй бол та миний энэ бичвэрийг хаа байгаа газраасаа уншиж чадахгүй байлаа, хэрвээ математик байгаагүй бол таны гар дахь ухаалаг утас ч байхгүй байлаа, хэрвээ математик байгаагүй бол Space X сансарт хөөрөхгүй байлаа, хэрвээ математик байгаагүй бол улс орны хөгжил, эдийн засаг гэж байхгүй байлаа, хэрвээ математик байгаагүй бол мөнгө байхгүй, дэлгүүр эмнэлэг, гоо сайхан аль аль нь байхгүй. Яг л оргүй хоосонг илэрхийлэх тэг шиг л байх байсан.
Хүн бүр математикч болох албагүй ч түүнийг ойлгодог байх хэрэгтэй гэж боддог. Аливаа улс орнуудын томоохон шийдвэр гаргалтын цаана үргэлж тооцоолол судалгаа бас математик байдаг.

Одоо хүртэл бага дунд сургуулийн математик боловсролын зорилго нь суралцагчдад анги дэвших, сургууль төгсөх болон аль нэг их дээд сургуулийн элсэлтийн шалгалтыг амжилттай давахад хүрэлцэхүйц мэдлэг, чадвар олгоход чиглэгдэж байна хэмээн Ц.Лувсандорж багш өгүүлсэн байсан. Энэ ч үнэний ортой шиг санагддаг. Эцэг эхчүүд үр хүүхдээ юу сурсан тухай асуухгүй атал ямар дүн авсныг үргэлж асууна. Багш математикийн агуулгыг хялбарчлаад, өмнөх төсөөллийг тандан судлаад шинэ мэдлэг олгож, цаашид бие даан суралцах, нөхцөл байдалд тохирсон дүгнэлт гаргах чадвар эзэмшүүлэх, учир шалтгааныг шүүн тунгаах, сэтгэн бодох чадварыг бүтээлчээр хөгжүүлэх, асуудлыг хайн олж түүнийг шийдвэрлэх, аливааг эмх цэгцтэй үнэлж дүгнэх, илэрхийлэх зэрэг олон чадварыг эзэмшүүлэхийг зорьдог. Түүнээс бүх сурагчдаа математикт 100% амжилт гаргадаг болгохын төлөө ажилладаггүй.

Тоо, хувьсагч, дүрс, хэмжигдэхүүн, өгөгдөлтэй ажиллах, асуудал шийдвэрлэх арга барилд суралцан, математикийн мэдлэг, чадвараа амьдрал, ахуйд хэрэглэснээр хэл, сэтгэлгээ, танин мэдэх чадвараа хөгжүүлж, математикийг сонирхон судлах хүсэл, тэмүүлэлтэй болгох манай улсын математик боловсролын гол зорилго. Мэдээж хүүхэд бүрийн онцлог, амьдарч буй орчин нөхцөл, суралцаж буй сургууль ч ялгаатай болсон энэ цаг мөчид төвийн сургуулийн сурагчид л математикт сайн бус бүх хүүхэд сайн байгаасай гэж хүсдэг.
Хийсвэрлэн сэтгэх, нарийн логик гаргалгаа хийх чадвар, өгөгдсөн нөхцөл байдалд аливаа зүйлсийн ерөнхий хэв шинжийг тодорхойлох гээд маш олон чухал чадваруудыг биднээс шаарддаг болсон. Энэ бүх чадвар бүх л салбар, бүхий л үйл ажиллагаанд чухал байр суурь эзэлж байна.

Тэгвэл энэ чадварт үр хүүхдээ хэрхэн бэлтгэх вэ?
Математикийн гоо сайхныг мэдрүүлээсэй гэж хэлэх байна.
Хэрэв та багш бол юмс үзэгдлийг ойлгох, танин мэдэх, эргэцүүлэн бодох, эрэл хайгуул хийх, эмх цэгцтэй, учир зүйтэй сэтгэн бодох, тайлбарлах, үндэслэх, дүгнэлт гаргах чадварыг хөгжүүлэх, бодит ертөнц, ахуй амьдралтай холбох, бодит ертөнц дэх асуудлыг загварчлах, математикийн олон арга байдгийг ойлгуулах, сурагчдын мэдээлэл харилцааны технологийг ашиглах чадварыг хөгжүүлэх, интернет ашиглан тодорхой асуудлаар мэдээлэл статистикийн тоо, баримт цуглуулан боловсруулах, график диаграммаар дүрслэх, математикийн түүхийг судлах гэх мэт олон аргуудаас ашиглаж болох юм.

Хэрэв та эцэг эх, ах эгч бол дүүгээ, үр хүүхдээ цэгцтэй зөв суралцахад нь туслах, хамт унших, хамт бодох, математикийг мэдсэнээр бид энэ дэлхийг танин мэдэх чадвар эзэмшихийг ойлгуулах үйл ажиллагаа хийх, тэдний яагаад гэх асуултад математик хариулт өгөхийг ухааруулах хэрэгтэй. Түүнд суралцсанаар цэгцтэй сэтгэх, арга техникээ оновчтой сонгох, зөв ярих, гол утга санааг түргэн ойлгох, зөв эрэмбэ дараалалтай байх, байлгах, өргөн хүрээтэй сэтгэх ч хамаарах юм. Гол нь таны хүү охин зөв хүн болоход математик гарцаагүй тусална гэдэгт би эргэлзэхгүй байна.

Яагаад далайн дун спираль хэлбэртэй байдгийг, яагаад зөгий үүрээ зөв зургаан өнцөгт хэлбэртэй байдгийг судлахад түүний цаана математик л байдаг. Урлагыг дэлхий нийтээрээ ойлгодог шиг математик бол бүх зүйлийг илэрхийлж болох хамгийн оновчтой бас хүч чадалтай түгээмэл хэл юм.
Эцэст нь математикийн хичээлийг хүнд хэцүү гэсэн буруу ойлголтоо халаасай гэж хүсэх байна. Математикийн шинжлэх ухаан бол зөвхөн тоо биш юм шүү. Дээр хэлсэнчлэн орчлон хорвоо дээр бүх л зүйлийг судална. Хувь хүний хөгжилд, нийгэмд, шинжлэх ухааны салбарт, улс төрд, дэлхийн соёлд нөлөөлөх хүч зөвхөн математикт бий.

Цэгцтэй зөв сэтгэх нь математикт суралцахаас эхтэй

Биологийн багш

Смарт сургуулийн биологийн багш Л.Батбаяр

Амьдралын тухай судалдаг ухаан бол биологи билээ. Энгийнээр хэлэхэд бүх гайхамшигт үзэгдлийг шавь нартаа таниулж, экосистемийг , хүрээлэн буй орчны мэдээллийг хүүхдүүдэд цэгцтэй олгохыг зорьдог. Мэргэжил минь удам дамжиж ирсэн учраас багш хүний арга барил, ухаан, сэтгэл, тэмүүлэл хандлагыг ээжээсээ үлгэрлэж өссөн. Эмээ өвөө маань хүртэл багшаас эхлээд сургуулийн захирлаар ажиллаж байсан учраас бага наснаасаа эхлэн багш болох хүсэлдээ хөтлөгдөн энэ мэргэжлийг сонгосон. Мэргэжилдээ хайртай бас дуртай.

Ажилласан жил: 10 жил
Гаргасан амжилт: Боловсролын яамны жуух бичиг

Бага ангийн багш

Бага ангийн багш Л.Оюун-Эрдэнэ

Ажилласан жил: 10
Гаргасан амжилт: Тоочин хүүхдүүд математикийн олимпиадаас 1 мөнгө, 2 хүрэл
Ур чадварын уралдаанд 1-р байр
Улсын интерактив уралдаанд 3-р байр
Ахлах багш цол тэмдэгтэй арга зүйч багш

Мэргэжилдээ дургүй, хүүхдэд хайргүй хүн хэзээ ч багш болж чаддаггүй.
Сурган хүмүүжүүлэх харилцаа амжилттай болох нэг үндсэн нөхцөл нь багш нар хүүхдүүдээ хамгийн түрүүнд хүндлэх, бүхий л эрхийг нь дээдлэх явдал юм.

Соёлыг мянган жил бүтээж болно. Түүнийг нэгхэн үеийн дотор нурааж болно. Холбон гагнах хүн нь багш соён гэгээрүүлэгч байдаг. Үеийг үетэй холбож гагнана гэдэг чухал ажил юм.

Хятад хэлний багш

Сайн байцгаана уу? Смарт сургуулийн хятад хэлний багш Азаа байна.

Ямар ч гадаад хэлийг сурахад зорилго, сонирхол хоёр хамгийн чухал байдаг.

Төгссөн сургууль: Тианжин их сургууль
Боловсролын байгууллагад ажиллаж буй жил: 2

Шагнал урамшуулал: шилдэг гадаад оюутан 2022-2023
Баримталдаг зарчим Зорьсон зорилгодоо үнэнч байх
Яагаад багш болсон шалтгаан: Зорилгодоо хүрсэн сурагчдаа харах нь хамгийн сайхан мэдрэмж байдаг.

Хил хязгааргүй боловсролыг түгээнэ.

ТНУ-ны багш

Сайн байцгаана уу? ТНУ-ны багш М.Сумбазар байна.
Төгссөн сургууль: МУБИС-НХУС
Боловсролын байгууллагад ажиллаж буй жил: 2 дахь жилдээ ажиллаж байна.
– СИИ сургалтанд хамрагдсан.
– Багшийн мэргэжил дээшлүүлэх сургалтанд хамрагдаж батламж авсан.
2022-2023 оны хичээлийн жилийн тайлангаа амжилттай хамгаалж шилдэг тайлангаар шалгарсан.

Шагнал урамшуулал:
МСХ-ны Тэргүүний залуу багш
Баримталдаг зарчим:
– Үнэнч шударга байх
– Хариуцлагатай байх
– Ёс суртахуунтай, соёлтой харилцах

Багш болсон шалтгаан:
– Улс орны хөгжлийн амин чухал зүйл бол чанартай боловсон хүчин байдаг. Иймд ирээдүйн боловсон хүчнийг удирдан чиглүүлж ёс суртахууны өндөр төлөвшилтэй, суралцахуйн үнэ цэнийг ухамсарласан хүнлэг энэрэнгүй иргэнийг төлөвшүүлэх зорилготой учраас багш мэргэжлийн сонгосон.
Мөн миний бие ЗГ-ын өндөр онооны тэтгэлэгээр 4 жил амжилттай суралцсан тул хичээнгүйлэн ажиллах болно.
Баярлалаа